Wazalishaji mvinyo walia na kodi ya ushuru wa bidhaa

Wasiliana na BMG kupitia 0757 43 26 94 ama binagimediagroup@gmail.com kwa huduma ya Habari na Matangazo.

Na George Binagi-GB Pazzo, BMG

Chama cha wazalishaji wa mvinyo wa matunda Tanzania (TALMA) kimeiomba Serikali kupunguza kodi ya ushuru wa bidhaa kutoka shilingi 200 hadi 63 kwa lita moja, hatua itakayosaidia wazalishaji wa bidhaa hiyo kumudu gharama za uendeshaji.

Ombi hilo limetolewa na Mwenyekiti wa chama hicho, Adolf Olomi kwenye mkutano wa kifaifa uliofanyika jana Jijini Mwanza na kuhudhuriwa na taasisi mbalimbali za Serikali ikiwemo mamlaka ya mapato nchini TRA, shirika la viwango Tanzania TBS pamoja na Shirika la Kuhudumia Viwanda Vidogo SIDO.

Aidha Olomi alitoa rai kwa wazalishaji wa mvinyo nchini kuhakikisha wanasajili bidhaa zao ili kufanya kazi kwa mujibu wa sheria ambapo kupitia mkutano huo taasisi na mamlaka mbalimbali za serikali zilitoa semina namna ya kutekeleza suala hilo.

Nao baadhi ya wazalishaji wa mvinyo, Straton Mzee kutoka kampuni ya Yande Investment ya Jijini Mwanza inayozalisha mvinyo wa “Harambee Banana Wine” pamoja na Anna Barnabas kutoka kampuni ya Bhunu Mbundi ya Jijini Arusha, wamesema kiwango kikubwa cha kodi ushuru wa bidhaa inahatarisha ukuaji wa wazalishaji wengi wa mvinyo nchini na hivyo kukwamisha kufikiwa kwa Tanzania ya Viwanda.

Mkuu wa Idara ya Huduma na Elimu (TRA) Mkoa Mwanza, Lutufyo Mtafya alisema ikiwa wazalishaji hao wanaona utekelezaji wa kodi ya ushuru wa bidhaa unakuwa mgumu kutokana na ukubwa wa gharama, wanaweza kuwasilisha serikalini mapendekezo yao kwa ajili ya kufanyiwa marekebisho kwa mujibu wa sheria.