BINAGI RADIO: KUMBUKUMBU YA MAUAJI YA MWANAHABARI DAUDI MWANGOSI KUFANYIKA KESHO.

Mkurugenzi Mtendaji wa UTPC Abubakar Karsan

Na:George GB Pazzo

Muungano wa Vyama vya Waandishi wa Habari nchini UTPC unatarajia kuadhimisha Kumbukumbu ya kumuenzi Mwandishi wa Habari Daudi Mwangosi alieuawa na polisi miaka mitatu iliyopita kwenye Mkutano wa Kisiasa akiwa kazini katika Kijiji cha Nyololo Mkoani Iringa.

Hayo yalielezwa wikendi iliyopita na Mkurugenzi Mtendaji wa Muungano huo Abubakar Karsan wakati akizungumza na Waandishi wa Habri katika ofisi za Umoja huo zilizopo Isamilo Jijini Mwanza.

Karsan alisema kuwa kumbukumbu hiyo inatarajiwa kuadhimishwa Septemba mbili mwaka huu Jijini Dar es salaam, ikiwa ni tarehe ambayo Mwangosi aliuawa.

Alibainisha  kuwa katika kuadhimisha Kumbukumbu hiyo, masuala mbalimbali yanatarajiwa kujadiliwa ikiwemo Usalama kwa Waandishi wa habari katika kuelekea Uchaguzi Mkuu nchini pamoja na kutoa taarifa juu ya Mfuko wa maendeleo wa Daudi Mwangosi  Media Support Fund ambao husimamia tuzo ya Uandishi wa Habari uliotukuka kwa mwandishi aliejitolea kufanya kazi zake kwa bidii ama kudhurika kutokana na kazi hizo.

Katika hatua nyingine Karsan aliwaasa Waandishi wa Habari nchini kutumia vema wajibu wao katika kipindi hiki cha kuelekea katika Uchaguzi Mkuu na kujiepusha na suala la upendeleo wa wagombea na vyama vya siasa katika kuandika na kuripoti habari za uchaguzi pamoja na kuwachagulia Wananchi viongozi badala ya kuwaacha wananchi wenyewe wawachague viongozi wanaowata kupitia sanduku la kupigia kura siku ya uchaguzi mkuu ambao unatarajia kufanyika octoba 25 mwaka huu.

Daudi Mwangosi aliuawa Septemba Mbili mwaka 2012 na kitu kilichosadikika kuwa ni bovu wakati polisi wakizuia kufanyika kwa mkutano wa hadhara wa Chama cha Demokrasia na Maendeleo Chadema katika Kijiji cha Nyololo Mkoani Iringa ambapo hadi mauti yanamkuta alikuwa ni Mwandishi wa Habari wa Kituo cha Runinga cha Chanel Ten na Mwenyekiti wa Chama cha Waandishi wa Habari Mkoani Iringa.

BONYEZA PLAY HAPA CHINI KUSIKILIZA

Daudi Mwangosi Enzi za Uhai Wake